Ungmennasambandið Úlfljótur auglýsir eftir umsóknum í styrktar- og afrekssjóð USÚ. Umsóknum má skila í tölvupósti á usu@usu.is, eða skriflega í Heklu, Hafnarbraut 15. Umsóknir þurfa að berast í síðasta lagi föstudaginn 22. nóvember. Rétt er að geta þess að þetta er eina úthlutun ársins.
Til að auðvelda sjóðsstjórn vinnu við afgreiðslu umsókna þurfa eftirfarandi hlutir að koma fram í umsókn:
Hver sækir um.
Stutt lýsing á því hvers vegna sótt er um.
Upphæð sem óskað er eftir.
Bankaupplýsingar (reikningsnúmer og kennitala).
Ef sótt er um vegna sérstakra verkefna, þarf auk framangreindra atriða að taka fram:
Áætlaður kostnaður.
Hyggst umsækjandi sækjast eftir styrkjum annars staðar?
Reglur og nánari upplýsingar um sjóðinn má finna hér.
Það fór sennilega framhjá fæstum að Unglingalandsmót UMFÍ fór fram hér á Höfn um verslunarmannahelgina. Um það bil þúsund keppendur tóku þátt og má reikna með að um 4-5 þúsund manns hafi verið í bænum vegna mótsins. Keppt var í hinum ýmsu greinum og alls voru 21 grein í boði. Metþátttaka var í greinum á borð við strandblak, strandhandbolta, bogfimi og kökuskreytingar. Einnig var góð þátttaka í skák, motocrossi, upplestri, stafsetningu og pílukasti sem var ný grein á mótinu. Má því segja að svokallaðar jaðargreinar og greinar sem ekki eru æfðar að staðaldri séu að verða vinsæll kostur á mótinu þar sem lagt er upp með að gleði og skemmtun séu við völd. Ásóknin í strandblak og strandhandbolta var svo mikil að bæta þurfti þriðja vellinum við á miðvikudeginum fyrir mót svo hægt væri að koma öllum liðum fyrir og spila gott mót. 104 keppendur kepptu fyrir hönd USÚ í margvíslegum greinum. Þeir voru allir USÚ til sóma og það var frábært að sjá að flestir virtust skemmta sér konunglega. Nóg var af afþreyingu fyrir alla fjölskylduna yfir daginn og landsþekkt tónlistarfólk hélt svo uppi stuðinu á kvöldin.
USÚ krakkar ganga inn á völlinn. (Mynd: USÚ)
Mótið var sett á föstudagskvöldinu með setningarathöfn á Sindravöllum sem Forseti Íslands og frú voru viðstödd. Lúðrasveit Hornafjarðar lék nokkur lög, formaður UMFÍ setti mótið, forseti Íslands flutti ávarp, Dagmar Lilja Óskarsdóttir söng Ísland er land þitt við undirspil lúðrasveitar, formaður USÚ dró hátíðarfána UMFÍ að húni og fulltrúi keppenda, Karen Hulda Finnsdóttir, sagði nokkur orð. Hefð er fyrir því að á setningu Unglingalandsmóta gangi þátttakendur á mótinu inn á völlinn áður en mótið er sett. Þá ganga fánaberar fremstir sem að þessu sinnu voru ungir hornfirskir íþróttaiðkendur sem flestir áttu það sameiginlegt að hafa fengið hvatningarverðlaun USÚ. Þá er einnig hefð fyrir því að mótseldurinn sé tendraður og voru það börn sem hafa verið dugleg við að mæta á Unglingalandsmót með fjölskyldum sínum undanfarin ár, sem hlupu með kyndilinn og tendruðu eldinn. Sú nýbreytni var einnig að kynnir mótssetningarinnar var keppandi á mótinu en það var hún Anna Lára Grétarsdóttir.
Anna Lára Grétarsdóttir, kynnir. (Mynd: Sveitarfélagið Hornafjörður)Fánaberar. (Mynd: USÚ)
Undirbúningur Unglingalandsmóts gerist ekki á einni nóttu og hafa mótshaldarar þ.e. Ungmennasambandið Úlfljótur, Sveitarfélagið Hornafjörður og Ungmennafélag Íslands unnið að því allt síðasta ár. En hversu góður sem undirbúningurinn er, væri ekki hægt að koma honum í framkvæmd nema með allri þeirri ómetanlegu vinnu sem sjálfboðaliðar vinna. Það eru þeir sem gera það að verkum að hægt er að halda svona mót. Það þarf t.d. um það bil 80 sjálfboðaliða bara á frjálsíþróttavöllinn. Í hverri grein þarf fólk til að sjá til þess að allt gangi eins og það á að ganga. En það er ekki bara í keppnisgreinunum þar sem þörfin fyrir sjálfboðaliða er, sjoppuvaktir, klósettvaktir, gæsla, móttaka, tjaldsvæði, eldhús og fleiri og fleiri störf þarf að vinna svo allt sé með besta móti. Í litlu samfélagi eins og okkar skiptir hver hönd gríðarlega miklu máli og sannaðist það svo sannarlega um helgina hversu öfluga sjálfboðaliða við eigum í sveitarfélaginu. Það er ekki hægt að þakka þeim sem komu að mótinu á einn eða annan hátt nógu oft fyrir frábær störf. Einnig á Björgunarfélag Hornafjarðar miklar þakkir skildar fyrir sinn þátt í mótinu en þau stýrðu gæslunni og sáu til þess að allir væru öruggir.
Nýr strandblaks- og strandhandboltavöllur. (Mynd: UMFÍ)
Mótinu var svo slitið á sunnudagskvöldinu af formanni UMFÍ. Formaður USÚ hélt stutt ávarp og gjaldkeri USÚ dró hátíðarfána UMFÍ niður. Hann verður svo sendur til Héraðssambandsins Skarphéðins en mótið 2020 verður haldið á Selfossi. Vaka Sif Tjörvadóttir, keppandi frá USÚ fékk sérstök heiðursverðlaun fyrir að hafa komið mótherja sínum í hjólreiðakeppni til aðstoðar. Sá hafði þurft að stoppa vegna öndunarörðugleika. Hún hringdi í 112 og beið með honum þar til frekari hjálp barst. Björgunarfélag Hornafjaðar bauð upp á glæsilega flugeldasýningu eftir mótsslitin og svo var dansað inn í nóttina.
Keppni í körfubolta í Bárunni. (Mynd: UMFÍ)
Mótið þótti takast afar vel, bæði framkvæmd þess og aðstaðan góð. Okkar allra stærsti kostur hér á Höfn er aðgengið og nálægðin milli keppnis- og tjaldsvæða. Þetta var sannkölluð fjölskylduhátíð þar sem allir skemmtu sér á heilbrigðan hátt saman.
Takk fyrir frábært mót, stjórn USÚ
Helstu úrslit hjá USÚ krökkum
Hér er listi yfir helstu úrslit keppenda frá USÚ. Það er ekki alveg víst að þetta sé tæmandi listi af verðlaunasætum, m.a. vegna þess að þegar þetta er ritað á eftir að setja inn úrslit í kökuskreytingum og motocrossi.
Vaka Sif Tjörvadóttir var í blandaða liðinu
Sykurpúðarnir, sem lenti í 2. sæti.
ORAbaunirnar, Daníel Haukur Bjarnason, Kári Hjaltason og
Lilja Rós Ragnarsdóttir lentu í 3. sæti.
Fimleikar (stökkfimi)
Í 11-12 ára flokki lentu Yum Yum núðlur, Daníel Haukur
Bjarnason, Kári Hjaltason, Lilja Rós Ragnarsdóttir, Vaka Sif Tjörvadóttir og
Guðlaug Gísladóttir, í 2. sæti í stökkfimi.
Í 13-14 ára flokki lentu Big Chungs, Nína Ingibjörg
Einarsdóttir, Róbert Þór Ævarsson, Ingólfur Vigfússon, Aðalsteinn
Aðalsteinsson, Friðrik Björn Friðriksson og Elín Ása Hjálmarsdóttir, í 3.
sæti í stökkfimi.
Frisbígolf
Anna Lára Grétarsdóttir, 11-14 ára stúlkur, 31 köst,
1. sæti.
Sara Kristín Kristjánsdóttir, 15-18 ára stúlkur, 32
köst, 2. sæti.
Frjálsar íþróttir
100 m hlaup pilta 13 ára, Björn Ívar Vilhjálmsson, 3.
sæti 14,52 sek
Kúluvarp pilta 13 ára, Björn Ívar Vilhjálmsson, 3.
Sæti 8,23 m
100 m hlaup pilta 15 ára, Tómas Nói Hauksson, 3. sæti
13,27 sek
800 m hlaup pilta 15 ára, Tómas Nói Hauksson, 2. sæti
2:29,93 mín
Langstökk pilta 15 ára, Tómas Nói Hauksson, 2. sæti
5,29 m, persónulegt met
Þrístökk pilta 15 ára, Tómas Nói Hauksson, 4. sæti,
11,14 m USÚ met í 15 ára flokki
Spjótkast stúlkna 11 ára, Lilja Rós Ragnarsdóttir, 2.
sæti 14,08 m
600 m hlaup stúlkna 14 ára, Anna Lára Grétarsdóttir,
2. sæti 1:55,07 mín
800 m hlaup stúlkna 15 ára, Hekla Karen Hermannsdóttir,
1. sæti 2:58,71 mín
800 m hlaup stúlkna 15 ára, Selma Ýr Ívarsdóttir, 3.
sæti 3:09,13 mín
4×100 m boðhlaup stúlkna 15 ára, Sveit USÚ, Selma Ýr
Ívarsdóttir, Hekla Karen Hermannsdóttir, Anna Lára Grétarsdóttir og Siggerður
Egla Hjaltadóttir, 1. sæti 59,89 sek
800 m hlaup stúlkna 16-17 ára, Arna Ósk Arnarsdóttir,
1. sæti 2:46,63 mín
Kúluvarp stúlkna 18 ára, Nanna Guðný Karlsdóttir, 1.
sæti 8,50 m
Spjótkast stúlkna 18 ára, Nanna Guðný Karlsdóttir, 3.
sæti 22,40 m
Keppni í langstökki. (Mynd: Ásgerður Kristín Gylfadóttir)
Glíma
Drengir 11-12 ára, Sverrir Sigurðsson, 2. sæti, Smári
Óliver Guðjónsson, 3. sæti og Kacper Ksepko, 4. sæti.
Drengir 13-14 ára, Almar Páll Lárusson, 1. sæti.
Skotfimi
Stefanía Björg Olsen, 3. sæti
Stafsetning
13-14 ára, Anna Lára Grétarsdóttir, 1. sæti.
15-18 ára, Ingunn Ósk Grétarsdóttir, 2-4. sæti
Sund
Magni Snær Imsland Grétarsson
1. sæti 13-14 ára piltar 100 m bringusund
1. sæti 13-14 ára piltar 50 m baksund
1. sæti 13-14 ára piltar 100 m skriðsund
1. sæti 13-14 ára piltar 100 m fjórsund
Heiðdís Elva Stefánsdóttir
3. sæti 13-14 ára stúlkur 100 m bringusund
3. sæti 13-14 ára stúlkur 50 m baksund
3. sæti 13-14 ára stúlkur 100 m skriðsund
3. sæti 13-14 ára stúlkur 50 m flugsund
3. sæti 13-14 ára stúlkur 100 m fjórsund
Anton Kristberg Sigurbjörnsson
3. sæti 11-12 ára piltar 50 m baksund
Keppendur frá USÚ voru einnig í fjölmörgum liðum í knattspyrnum, körfuknattleik, strandblaki og strandhandbolta, ýmist í sér liðum eða blönduðum liðum. Í öllum þessum greinum átti USÚ einhverja í verðlaunasæti, en of langt mál væri að telja upp alla þá keppendur sem í þeim liðum voru. Hægt er að sjá öll úrslit og lokastöðu á www.ulm.is. Þar má einnig sjá önnur úrslit á mótinu, en þegar þetta er ritað á eftir að setja inn úrslit í kökuskreytingum og motocross.
Unglingalandsmót UMFÍ 2019 fer fram um verslunarmannahelgina á Höfn í Hornafirði í samstarfi við Ungmennasambandið Úlfljót (USÚ) og Sveitarfélagið Hornafjörð. Öll ungmenni á aldrinum 11 – 18 ára geta skráð sig til leiks. Þar reyna þátttakendur með sér í fjölmörgum íþróttagreinum en samhliða er boðið upp á fjölbreytta afþreyingu, leiki og skemmtun fyrir alla fjölskylduna. Ekki er skilyrði að vera skráð/ur í ungmenna- eða íþróttafélag til að koma á Unglingalandsmót UMFÍ.
Eins og á öllum Unglingalandsmótum UMFÍ er keppt í fjölmörgum skemmtilegum greinum alla mótsdagana. Á kvöldin verða tónleikar með m.a. Bríeti, Daða Frey, Úlfi Úlfi, Sölku Sól, Unu Stef og GDRN.
Nánari upplýsingar um keppnisgreinar og skráning á vefslóðinni: www.ulm.is
Það er rétt að taka það fram að samkvæmt samþykktum síðasta ársþings USÚ, þá þurfa þátttakendur frá USÚ ekki að greiða þátttökugjaldið. Það er hugsað sem hvatning til þess að fá sem flesta heimamenn til að taka þátt.
Margar hendur vinna létt verk og því er alltaf pláss fyrir sjálfboðaliða. Umsjón með utanumhaldi sjálfboðaliða hefur Kristín Gyða Ármannsdóttir, 895-4569 eða kristin@usu.is.
Íþróttamaður USÚ var útnefndur á ársþinginu. Einnig hlutu fjórir ungir og efnilegir íþróttamenn hvatningarverðlaun.
Íþróttamaður USÚ árið 2018 er Hallmar Hallsson.
Hallmar Hallsson er uppalinn Hornfirðingur. Hann byrjaði ungur að stunda körfuknattleik með Sindra og var ekki margra vetra þegar hann var farinn að láta til sín taka með meistaraflokki félagsins. Hallmar hefur nánast alla tíð spilað með Sindra, að undanskildum tímabilum í fyrstu- og úrvalsdeild í Borgarnesi, á Selfossi og á Egilsstöðum. Tímabilið 2017-2018 tók Hallmar við þjálfun meistaraflokks Sindra sem spilandi þjálfari eftir brösugt gengi liðsins í fyrstu leikjum tímabilsins. Eftir að Hallmar tók við varð algjör viðsnúningur í gengi liðsins og unnust allir leikir tímabilsins sem endaði á því að liðið vann sig upp í 1. deild í fyrsta skipti í sögu félagsins. Árangur liðsins var ekki síst að þakka góðu starfi þjálfarans sem hélt vel utan um hópinn og náði að skapa góða liðsheild og jákvæða stemningu í kringum liðið.
Hallmar gat ekki verið viðstaddur viðurkenninguna, en mun fá verðlaunagripinn við tækifæri.
Hallmar í úrslitaleik 2. deildar vorið 2018. Sindri vann lið KV 82-77. (Mynd: Benóný Þórhallsson)
Hvatningarverðlaun hlutu:
Birkir Snær Ingólfsson er fæddur árið 2004. Hann er frábær fyrirmynd fyrir alla iðkendur Sindra. Honum hefur farið mikið fram á síðastliðnu ári og bætt sig verulega sem knattspyrnumaður. Það sem Birkir leggur á sig til að ná þessum árangri er aðdáunarvert. Hann er alltaf fyrstur á æfingar, ávallt jákvæður og mætir á hverja æfingu með því markmiði að gera betur en síðast. Hann er alltaf til í að aðstoða, hvort sem það er að hjálpa félaganum, ganga frá eftir æfingar eða aðstoða yngri iðkendur. Það er þessi vinna sem Birkir Snær hefur lagt á sig sem hefur skilað honum í hæfileikamótun KSÍ sem og tvo úrtakshópa hjá u15 ára landsliðinu þar sem hann hefur staðið sig með mikilli prýði og fengið lof landsliðsþjálfara fyrir frábært hugafar og eljusemi.
Birkir Snær Ingólfsson hlaut hvatningarverðlaun USÚ 2018. (Mynd: SÓJ)
Tómas Nói Hauksson er fæddur 2004. Hann byrjaði að æfa fótbolta þegar hann var 6 ára og fyrir þremur árum fór hann einnig að æfa frjálsar. Það var svo veturinn 2017 sem að hann sneri sér alfarið yfir í frjálsar. Tómas Nói stundar sína íþrótt af alhug og er hann mjög agaður í samskiptum, hvetjandi við aðra og sérstaklega góður strákur. Ásamt því að mæta á frjálsíþróttaæfingar er hann í þol-og styrktartímum í Sporthöllinni. Hann hefur staðið sig vel á þeim mótum sem hann hefur farið á s.l. 2 ár og er hann nú þegar búinn að slá 5 Úlfljótsmet og við vonum að hann sé bara rétt að byrja þessa vegferð.
Tómas Nói Hauksson hlaut hvatningarverðlaun USÚ 2018. (Mynd: SÓJ)
Sigursteinn Már Hafsteinsson er fæddur árið 2002. Hann æfir og spilar knattspyrnu með meistaraflokki karla. Hann er samviskusamur drengur og hefur mikinn metnað fyrir því sem hann gerir. Hann æfir gríðarlega vel og gefur sig alltaf allan í þau verkefni sem fyrir honum standa. Hann hugsar vel um sjálfan sig bæði hvað varðar svefn og næringu. Auk þess að æfa sjálfur er Sigursteinn aðstoðarþjálfari 5.fl kk og kvk og 6. og 7.flokk kk og kvk.
Sigursteinn Már Hafsteinsson hlaut hvatningarverðlaun USÚ 2018. (Mynd: SÓJ)
Nína Dögg Jóhannsdóttir er fædd 2003. Hún æfir með unglingastigi og mfl. kvk Sindra og spilaði sína fyrstu leiki með mfl. kvk í vetur í 2. deild Íslandsmótsins. Nína er drífandi og hefur mikinn metnað og áhuga fyrir körfubolta. Hún sá til dæmis um það að ganga með undirskriftalista í skólana til þess að safna undirskriftum áhugasamra um stofnum meistaraflokks kvenna í körfubolta.
Nína Dögg Jóhannsdóttir hlaut hvatningarverðlaun USÚ 2018. (Mynd: SÓJ)Allir handhafar hvatningarverðlauna USÚ 2018. Frá vinstri: Nína Dögg, Birkir Snær, Tómas Nói og Sigursteinn Már. (Mynd: SÓJ)
Ársþing USÚ, það 86. í röðinni fór fram í Heklu, nýju félagsheimili ungmennafélagsins Sindra í gær, 27. mars. Þingið var ágætlega sótt, 33 fulltrúar af 46 mættu frá flestum félögum. Því miður mætti enginn frá Hestamannafélaginu Hornfirðingi.
Áður en þingið var sett, minntist Jóhanna Íris Ingólfsdóttir, formaður USÚ, tveggja félaga sem féllu frá á árinu 2018. Það voru þeir Hreinn Eiríksson, annar tveggja heiðursfélaga USÚ frá upphafi, formaður USÚ 1963-1965 og máttarstólpi í starfi Umf. Mána um áratugaskeið; og Kristján Vífill Karlsson sem var sannkölluð fyrirmynd sjálfboðaliða, sem um áratugaskeið vann óeigingjarnt sjálfboðalið fyrir hinar ýmsu deildir Umf. Sindra, Golfklúbb Hornafjarðar og önnur félög innan USÚ.
Ýmislegt var á döfinni hjá USÚ á árinu og má þar nefna Unglingalandsmót sem haldið var í Þorlákshöfn um verslunarmannahelgina auk Landsmótsins sem haldið var á Sauðárkróki í júlí. Nokkuð mikið púður hefur farið í undirbúning unglingalandsmóts 2019, sem USÚ mun halda á Höfn. Mikið hefur verið fundað. Búið er að manna allar helstu stöður í undirbúningsnefndinni, auk þess sem flestir sérgreinastjórar hafa verið valdir.
USÚ sendi sína fulltrúa á þá fundi og þing sem okkur bar, eins og sambandsráðsfundi og vorfund UMFÍ og formannafund ÍSÍ sem haldinn var í tengslum við ráðstefnu um framtíðarskipulag íþróttahreyfingarinnar.
Frá 86. ársþingi USÚ. (Mynd: SÓJ)
Arna Ósk Harðardóttir stýrði þinginu af röggsemi líkt og oft áður. Fimm tillögur frá stjórn lágu fyrir þinginu. Fyrst má nefna hvatningu til ungmennafélaga til að fjölmenna á Landsmót UMFÍ 50+, sem haldið verður í Neskaupstað 28.-30. júní n.k. og að sjálfsögðu á 22. Unglingalandsmót UMFÍ sem haldið verður á Höfn um verslunarmannahelgina. Tillagan felur einnig í sér hvatningu til að taka þátt í almenningsíþróttaverkefnum á vegum UMFÍ og ÍSÍ.
Tillaga um að hvetja félagsmenn og aðra íbúa sveitarfélagsins Hornafjarðar til að taka þátt í undirbúningi og framkvæmd unglingalandsmótsins var samþykkt, auk tillögu um að USÚ greiði þátttökugjald sinna keppenda á unglingalandsmótinu, líkt og gert var árið 2013.
Þá voru samþykktar smávægilegar breytingar á lögum USÚ. Lög USÚ eftir breytingar má finna hér.
Fimmta tillagan var um það hvort nýstofnað Klifurfélag Öræfa (KFÖ) fengi inngöngu í USÚ. Í ljósi þess að formleg umsókn KFÖ barst ekki fyrr en degi fyrir þing, kom fram önnur tillaga á þinginu um að fresta inngöngunni fram að næsta ársþingi. Sú tillaga var samþykkt.
Stjórn USÚ gaf kost á sér til endurkjörs og var endurkjörin. Hana skipa: Jóhanna Íris Ingólfsdóttir, formaður, Kristján Örn Ebenezarson, ritari, og Sigurður Óskar Jónsson, gjaldkeri. Ásta Steinunn Eiríksdóttir, gaf kost á sér áfram sem varamaður, en Matthildur Ásmundardóttir, sem gegnt hefur stöðu bæjarstjóra sveitarfélagsins Hornafjarðar frá síðasta ári, gaf ekki kost á sér áfram. Stungið var upp á Hjálmari Jens Sigurðssyni, sem var samþykkt. Það voru ekki flókin skipti, því Hjálmar er eiginmaður Matthildar.
Líney Rut Halldórsdóttir, framkvæmdastjóri ÍSÍ og Halla Kjartansdóttir, skrifstofustjóri ÍSÍ, sátu þingið. Auk þess að flytja kveðju frá framkvæmdastjórn og öðru starfsfólki ÍSÍ, vék Líney Rut m.a. að málefnum Felix, félagakerfis íþróttahreyfingarinnar, persónuvernd og málefnum tengdum #metoo í ræðu sinni. Að lokum sæmdi hún Hjálmar Jens Sigurðsson silfurmerki ÍSÍ. Hjálmar hefur undanfarin ár leitt metnaðarfullt starf körfuknattleiksdeildar Sindra, sem m.a. hefur skilað sér í því að meistaraflokkur karla spilaði í fyrsta sinn í sögunni í 1. deild í körfubolta.
Líney Rut Halldórsdóttir, framkvæmdastjóri ÍSÍ, Hjálmar Jens Sigurðsson, silfurmerkishafi ÍSÍ og Jóhanna Íris Ingólfsdóttir, formaður USÚ. (Mynd: SÓJ)
Gunnar Gunnarsson, stjórnarmaður í UMFÍ sat einnig þingið. Hann bað fyrir kveðju frá stjórn og starfsfólki UMFÍ. Að lokum sæmdi hann Halldór Einarsson, sem hefur setið í stjórn Umf. Mána síðan 1999, starfsmerki UMFÍ. Einnig sæmdi hann Sigurð Óskar Jónsson, gjaldkera USÚ, starfsmerki UMFÍ. Auk þess að hafa verið gjaldkeri USÚ síðan 2011, hefur Sigurður verið í stjórn Umf. Mána frá 2005, (þar sem hann hefur gegnt öllum stöðum nema gjaldkerastöðunni), og setið í varastjórn UMFÍ síðan 2015.
Gunnar Gunnarsson, stjórn UMFÍ og Halldór Einarsson, starfsmerkishafi UMFÍ. (Mynd: SÓJ)Gunnar Gunnarsson, stjórn UMFÍ og Sigurður Óskar Jónsson, gjaldkeri USÚ og starfsmerkishafi UMFÍ. (Mynd: KÖE)
Íþróttamaður USÚ fyrir árið 2018 var útnefndur á þinginu auk þess sem fjórir ungir iðkendur hlutu hvatningarverðlaun USÚ. Nánar má lesa um þessar viðurkenningar í frétt sem birtast á síðunni síðar í kvöld eða á morgun.
Hér er hægt að lesa skýrslu stjórnar USÚ fyrir árið 2018. Reikningar sambandsins eru í skýrslunni og einnig er þar að finna starfsskýrslur allra aðildarfélaga auk starfandi deilda innan Umf. Sindra.
86. ársþing USÚ verður haldið í Heklu, nýju félagsheimili Umf. Sindra, Hafnarbraut 15 á Höfn, miðvikudaginn 27. mars næstkomandi, klukkan 18:00. Um fulltrúa á ársþingi segir m.a. í lögum USÚ:
Á ársþingi hafa allir sambandsaðilar málfrelsi og tillögurétt, en aðeins stjórn og fulltrúar atkvæðisrétt. Stjórnin getur boðið öðrum aðilum þingsetu er hún telur ástæðu til. Aðeins sá sem er félagi innan sambandsins er kjörgengur fulltrúi á ársþingi. Hver þingfulltrúi hefur eitt atkvæði. Allir þingfulltrúar skulu hafa kjörbréf.
Alls eiga 46 fulltrúar rétt á setu á þinginu, misjafnlega margir frá hverju félagi. Þeir sem hafa áhuga á að mæta ættu að hafa samband við stjórn síns félags.
Ungmennasambandið Úlfljótur auglýsir eftir umsóknum í styrktar- og afrekssjóð USÚ. Umsóknum má skila skriflega í Sindrahúsið, Hafnarbraut 25, eða í tölvupósti á usu@usu.is. Umsóknir þurfa að berast í síðasta lagi föstudaginn 9. nóvember. Rétt er að geta þess að þetta er eina úthlutun ársins.
Til að auðvelda sjóðsstjórn vinnu við afgreiðslu umsókna þurfa eftirfarandi hlutir að koma fram í umsókn:
Hver sækir um.
Stutt lýsing á því hvers vegna sótt er um.
Upphæð sem óskað er eftir.
Bankaupplýsingar (reikningsnúmer og kennitölu).
Ef sótt er um vegna sérstakra verkefna, þarf auk framangreindra atriða að taka fram:
Áætlaður kostnaður.
Hyggst umsækjandi sækjast eftir styrkjum annars staðar?
Reglur og nánari upplýsingar um sjóðinn má finna hér.
Um verslunarmannahelgina var 21. Unglingalandsmót UMFÍ haldið í Þorlákshöfn þar sem tæplega 1300 börn allsstaðar að af landinu voru skráð til keppni. Alls fóru 16 keppendur frá USÚ og kepptu þau í hinum ýmsu greinum. Þau stóðu sig öll með mikilli prýði og lentu mörg á palli eða voru ofarlega í sínum greinum. Okkur þótti sérstaklega ánægjulegt að brottfluttir Hornfirðingar skildu keppa undir merkjum USÚ. Mótið fór vel fram í alla staði og eiga HSK og Sveitarfélagið Ölfus skilið hrós fyrir framkvæmd mótsins. Það rigndi duglega á föstudeginum en keppendur létu það ekki á sig fá og héldu sínu striki. Þó var tekin sú ákvörðun að fresta setningu mótsins til laugardags, enda mun betri veðurspá það sem eftir var af helginni. Mótinu var svo slitið með veglegri flugeldasýningu á sunnudagskvöldinu.
Hluti keppenda USÚ á mótssetningunni.
Unglingalandsmót UMFÍ var fyrst haldið árið 1992 en hefur verið haldið árlega frá árinu 2002 og er fyrir börn á aldrinum 11-18 ára. Mótið hefur stækkað töluvert frá því að það var fyrst haldið og hefur keppnisgreinum fjölgað til muna. Misjafnt er hversu margar greinar eru á hverju móti þó svo að alltaf sé ákveðinn kjarni sem boðið er upp á. Alls var keppt í 22 greinum í Þorlákshöfn og voru það bogfimi, dorgveiði, fimleikalíf, fótbolti, frisbígolf, frjálsar íþróttir, glíma, golf, götuhjólreiðar, hestaíþróttir, íþróttir fatlaðra, kökuskreytingar, körfubolti, motocross, sandkastalagerð, skák, skotfimi, stafsetning, strandblak, strandhandbolti, sund og upplestur. Gríðarlega mikil þátttaka var í nýjum greinum á borð við kökuskreytingar þar sem um 250 keppendur voru skráðir, í bogfimi voru 86 skráðir í tveimur keppnisflokkum, og strandhandbolta en þar voru 36 lið skráð til keppni, eða um 220 keppendur. Ekki þarf að ná í heilt lið frá hverju félagi til þess að geta keppt í hópíþróttum. Búin eru til blönduð lið með þeim einstaklingum sem skrá sig án liðs t.d. kepptu tveir drengir frá USÚ með liði frá Laugarvatni í körfubolta og USÚ stúlka með blönduðu liði í strandblaki.
Keppendur í kökuskreytingum.
Mótið snýst ekki eingöngu um keppni hjá 11-18 ára því mikið er um að vera frá morgni til kvölds. Þorlákshöfn bauð m.a. uppá fótboltakeppni, frjálsíþróttaleika og sundleika fyrir 10 ára og yngri, gönguferðir um nágrennið, leikjatorg, þrautabraut, 3:3 fjölskyldumót í fótbolta og að sjálfsögðu kvöldvökur þar sem allra fremsta tónlistarfólk landsins kom fram. Unglingalandsmót UMFÍ er með öllu vímulaust og því góður staður fyrir fjölskyldur til þess að hafa gaman saman um verslunarmannahelgina.
Tómas Nói Hauksson
Það væri þó ekki hægt að halda þessi mót án mikillar samvinnu mótshaldara, sveitarfélaganna og íbúa þeirra. Þau eru að langmestu byggð á sjálfboðavinnu og það er ómetanlegt hversu margir eru tilbúnir til þess að leggja sitt af mörkum til þess að ungviði landsins fái að njóta sín á heilbrigðum vettvangi þar sem gleði og skemmtun er í fyrirrúmi. Við Hornfirðingar erum svo heppin að fá að halda mótið á næsta ári. Það verður þá í þriðja skipti en áður var það haldið árið 2007 þegar glæsileg, endurbætt íþróttaaðstaða var tekin í notkun á Sindravöllum og svo árið 2013 þegar að ný sundlaug og knattspyrnuhús höfðu bæst við aðstöðuna. Það má því segja að aðstaðan okkar hér sé með góðu móti og enn er verið að bæta í. Undirbúningshópur hefur verið að störfum síðastliðið ár og mun stærri hópur halda áfram þeirri vinnu í vetur. Það er ljóst, eins og áður sagði, að þetta er mikil samvinna og hvetjum við því íbúa til þess að taka þátt í þessu skemmtilega verkefni með okkur næsta sumar. Eins og Haukur Valtýsson, formaður UMFÍ, kom að í setningarræðu sinni eru forvarnir fjárfesting til framtíðar í betra lífi viðkomandi einstaklinga, hvort heldur er í því að forða eða seinka því að ungt fólk komist í kynni við hin ýmsu vímuefni sem í boði eru í samfélagi okkar í dag.
Fyrir hönd stjórnar USÚ
Jóhanna Íris Ingólfsdóttir, formaður
—
Helstu úrslit keppenda USÚ (ekki alveg víst að þetta sé tæmandi listi)
Bogfimi
Tómas Nói Hauksson, 2. sæti í opnum flokki 11-14 ára, með 134 stig
Karen Hulda Finnsdóttir, 5. sæti í sama flokki, með 128 stig
Glíma
Almar Páll Lárusson, 3. sæti í 13-14 ára drengjaflokki (fjölmennasti flokkurinn)
Sund
Magni Snær Imsland Grétarsson,
2. sæti í 100 m bringusundi 11-12 ára
3. sæti í 50 m baksundi 11-12 ára
3. sæti í 100 m skriðsundi 11-12 ára
2. sæti í 50 m flugsundi 11-12 ára
4. sæti í 100 m fjórsundi 11-12 ára
Magni Snær á palli
Frjálsar íþróttir
Arna Ósk Arnarsdóttir, 2. sæti í 800 m hlaupi 15 ára stúlkna, 2:40,68.
Tómas Nói Hauksson, 2. sæti í 600 m hlaupi 14 ára pilta, 1:40,91, nýtt USÚ met í öllum karlaflokkum, sem Fannar Blær Austar Egilsson átti áður.
Tómas Nói Hauksson, 2. sæti í þrístökki 14 ára pilta, 11,22, nýtt USÚ met í 14 og 15 ára karlaflokkum, sem hann átti reyndar sjálfur.
Selma Ýr Ívarsdóttir, 2. sæti í 80 m grindahlaupi 14 ára stúlkna, 14,53
Elín Ósk Óskarsdóttir, 3. sæti í spjótkasti 11 ára stúlkna, 17,29
Sveit USÚ + ein lánsmanneskja, 3. sæti í 4×100 m boðhlaupi 11 ára stúlkna, 66,65 sek.
Strandblak
Jana Mekkín Friðriksdóttir, 1. sæti í strandblaki 15-16 ára stúlkna, í blandaða liðinu Blakskvísur.
Á 85. ársþingi USÚ, sem haldið var í Hofgarði í Öræfum, 12. mars 2018 var íþróttamanni USÚ árið 2017 veitt viðurkenning. Ekki alveg þó, því þetta árið ákvað stjórn USÚ að breyta örlítið út af vananum og verðlauna lið ársins. Þar að auki fengu þrjú ungmenni sem þótt hafa staðið sig vel á árinu viðurkenningu, og hvött til áframhaldandi velgengni. Kristján Örn Ebenezersson, ritari USÚ, afhenti öll verðlaunin. Því er hann á öllum myndunum.
Lið ársins 2017
Í ár var ákveðið að breyta aðeins út af vananum og veita verðlaun fyrir lið ársins í staðinn fyrir íþróttamann ársins. Það voru margir einstaklingar sem stóðu sig vel á árinu en á endanum var ákveðið að veita verðlaun fyrir liðsheildina sem skilaði frábærum árangri hjá meistaraflokki karla í körfuknattleik. Það var skipað heimamönnum að stærstum hluta og náði liðið að vinna sig upp í 2. deild og eru langt komnir með að tryggja sig upp í 1. deild. Á síðasta tímabili töpuðu þeir aðeins einum leik í Íslandsmótinu og hafa haldið svipuðum hætti á núverandi tímabili.
Sindrastrákar eftir sigurleik gegn Þór Þorlákshöfn B, í úrslitum 3. deildar 2017. (Mynd: Hjálmar Jens Sigurðsson, körfuknattleiksdeild Sindra)
Hjálmar Jens Sigurðsson, formaður körfuknattleiksdeildar Sindra og Tómas Orri Hjálmarsson, leikmaður Sindra, tóku við viðurkenningunni frá Kristjáni Erni Ebenezerssyni, ritara USÚ. (Mynd: SÓJ)
Hvatningarverðlaun hlutu:
Salvör Dalla Hjaltadóttir er fædd árið 2003 og er ung og efnileg knattspyrnukona. Spilaði hún sína fyrstu leiki með meistaraflokk kvenna á árinu og skoraði eitt mark í átta leikjum. Í febrúar á þessu ári var hún síðan valin til að taka þátt í úrtaksæfingum fyrir U15 lið stúlkna í knattspyrnu.
Salvör Dalla Hjaltadóttir hlaut Hvatningarverðlaun USÚ 2017. (Mynd: SÓJ)
Tómas Orri Hjálmarsson er fæddur árið 2003 er ungur og efnilegur körfuknattleiksmaður. Hann spilaði sýna fyrstu meistaraflokksleiki á árinu. Einnig var hann boðaður á æfingar með U15 í körfuknattleik.
Tómas Orri Hjálmarsson hlaut hvatningarverðlaun USÚ 2017. (Mynd: SÓJ)
Angela Rán Egilsdóttir er fædd árið 2003 er ung og efnileg fimleikakona sem keppir fyrir fimleikadeild Sindra. Hún var valin í landsliðsúrtak í hópfimleikum fyrir EM 2018 og er hún gjaldgeng í unglingaflokk fyrir næsta verkefni EM 2020.
Angela Rán Egilsdóttir hlaut hvatningarverðlaun USÚ 2017. (Mynd: SÓJ)
Ársþing USÚ, það 85. í röðinni fór fram í Hofgarði í Öræfum í gær, 12. mars. 24 ár eru liðin síðan ársþing USÚ var síðast haldið í Öræfum, og því löngu kominn tími til að endurtaka leikinn. Þingið var ágætlega sótt, 27 fulltrúar af 42 mættu frá flestum félögum. Því miður mætti enginn frá Akstursíþróttafélagi Austur-Skaftafellssýslu.
Segja má að þingið hafi verið frekar óvenjulegt að ýmsu leyti. Viku fyrir þing lá fyrir að formaður USÚ gæti ekki mætt á þingið, þar sem hún er komin á síðasta mánuð meðgöngu. Þá var veðurspáin fyrir Öræfin þennan daginn ekkert spennandi, strekkingsvindur, vindhviður upp undir 34 m/s við Sandfell og einhver smávægileg snjókoma með. Þá fór rafmagnið af Öræfum í hádeginu, og því var á tímabili nokkuð tvísýnt hvort þingið gæti yfir höfuð farið fram. Komið hafði verið á varaafli á Hofi áður en þingið hófst, en rafmagnið datt svo aftur út á meðan þingfulltrúar gæddu sér á dýrindis kjötsúpu sem boðið var upp á. Það kom hins vegar inn aftur stuttu síðar, svo það þurfti ekki að ljúka þinginu við kertaljós.
Starfsmenn þingsins gæða sér á kjötsúpu við kertaljós í rafmagnsleysi. (Mynd: SÓJ)
Ýmislegt var á döfinni hjá USÚ á árinu og má þar nefna unglingalandsmót sem haldið var á Egilsstöðum um verslunarmannahelgina. Nokkuð púður fór í undirbúning unglingalandsmóts 2019, sem USÚ mun halda á Höfn. Fundað hefur verið nokkrum sinnum nú þegar, en undirbúningshópurinn mun stækka þegar nær dregur haustinu.
USÚ sendi sína fulltrúa á þá fundi og þing sem okkur bar, eins og sambandsþing og vorfund UMFÍ og íþróttaþing og formannafund ÍSÍ.
Fjórar tillögur frá stjórn lágu fyrir þinginu. Fyrst má nefna hvatningu til ungmennafélaga til að fjölmenna á Landsmót UMFÍ og Landsmót UMFÍ 50+, sem haldin verða samhliða á Sauðárkróki 12.-15. júlí n.k. og á unglingalandsmót UMFÍ í Þorlákshöfn um verslunarmannahelgina. Tillagan felur einnig í sér hvatningu til að taka þátt í almenningsíþróttaverkefnum á vegum UMFÍ og ÍSÍ.
Þá voru samþykktar breytingar á lögum USÚ. Lög USÚ eftir breytingar má finna hér. Einnig var gerð breyting á 7. grein reglugerðar um Styrktar- og afrekssjóð USÚ. Þá reglugerð má finna hér.
Stjórn USÚ gaf kost á sér til endurkjörs og var endurkjörin. Hana skipa: Jóhanna Íris Ingólfsdóttir, formaður, Kristján Örn Ebenezarson, ritari, og Sigurður Óskar Jónsson, gjaldkeri. Varamenn eru áfram Matthildur Ásmundardóttir, Sindra, og Ásta Steinunn Eiríksdóttir, Mána.
Þingfulltrúar 2018 í matarhléi í rafmagnsleysi. (Mynd: SÓJ)
Þannig vildi til að bæði Ragnheiður Högnadóttir, stjórnarmaður í UMFÍ, og Líney Rut Halldórsdóttir, framkvæmdastjóri ÍSÍ, sem boðað höfðu komu sína, afboðuðu sig með skömmum fyrirvara. Bæði var þar veðrinu um að kenna, auk mikilla anna á skrifstofu ÍSÍ. Þær sendu þó báðar kveðjur sem komið var á framfæri á þinginu.
Íþróttamaður USÚ var útnefndur á þinginu auk þess sem þrír ungir iðkendur hlutu hvatningarverðlaun USÚ fyrir árið 2017. Nánar má lesa um þessar viðurkenningar í frétt sem birtast á síðunni síðar í kvöld eða á morgun.
Hér er hægt að lesa skýrslu stjórnar USÚ fyrir árið 2017. Reikningar sambandsins eru í skýrslunni og einnig er þar að finna starfsskýrslur allra aðildarfélaga auk starfandi deilda innan Umf. Sindra.
